كريب الجبنة على "سفرة دايمة"


النهارده هنعمل مع بعض كريب بالجبنة ومربى التوت بطريقة بسيطة وسهلة ممكن تقدميها لأسرتك في الفطار أو الغذاء.

كريب الجبنة
المقادير:
كوب دقيق
3 ملعقة كبيرة زيت زيتون
ملعقة كبيرة سكر
¼ كوب ميه
رشة ملح
كوب لبن
2 بيضة
زبدة

مقادير الحشو:
3 ملعقة كبيرة سكر بودرة
ملعقة كبيرة ليمون مبشور
1½ كوب جبنة بيضاء
بيضة

للتزيين:
½ كوب مربى
¼ كوب ميه

الطريقة:
1-
ضيفي على الدقيق البيض وزيت الزيتون والملح والسكر والميه واخلطيهم مع
بعض، وبعد كده ضيفي عليهم اللبن واخلطيهم كويس مع بعض لحد ما يتجانس
الخليط، وبعد كده حطي الخليط في الثلاجة لمدة ساعة.

2- للتزيين: اغلي المربى على النار مع الميه، وبعد كده ارفعيها من على النار وسيبيها على جنب.

3- للحشو: اخلطي الجبنة مع البيضة والسكر البودرة والليمون مع بعض وسيبيهم على جنب.

4-
طلعي عجينة الكريب من الثلاجة وحطي شوية منها على النار واقلبيها على
الناحية التانية وكرري الخطوة دي مع باقي العجين، وبعد كده ابدأي حطي الحشو
في الكريب ولفيها كويس وكرري الخطوة دي مع باقي الكريب.

5- ادهني الصينية بالزبدة ورصي فيها الكريب وحطيه في الفرن لمدة من 10-15 دقيقة وطلعيه من الفرن وقدميه مع المربى.. وبالهنا والشفا.



خلصت وصفتنا النهارده..
استنونا كل يوم مع وصفات جديدة..
سلام،،،